Ishuri ribanza ryigenga Trust Mountain Academy ni ishuri ribarizwa i Shyorongi mu karere ka Rulindo, ryashinzwe mu mwaka wa 2017. Mu mwaka w'amashuri 2023-2024 ryongeye guca agahigo, aho ryahigaga amashuri yose abanza abarizwa mu karere ka Rulindo rikegukana umwanya wa mbere, ku rwego rw'igihugu rikaba irya 75 mu mashuri arenga 3720. Aha, iki kigo kikaba cyaratsindishije bose 100%.

Ni ku nshuro ya kabili kuko mu mwaka w'amashuri 2022-2023 ishuri Trust Mountain Academy ryari ryaje ku isonga mu karere ka Rulindo. Ubu buhanga no kwitwara neza mu bizamini bisoza amashuri abanza bikomoka ku bunararibonye bw'abarezi babo, ubuyobozi bw'ikigo, imikoranire y'ababyeyi bafite abana biga kuri iryo shuri ndetse n'ababyeyi bashinze ishuri bibumbiye mu muryango APPES Shyorongi. 

 

Mu rwego rwego rwo gushimira ishuri, umuyobozi w'Akarere ka Rulindo Madamu MUKANYIRIGIRA Judith yifatanyije n'abarezi, abanyeshuri n'ababyeyi bo mu murenge wa Shyorongi mu munsi mukuru mpuzamahanga wa mwarimu wabaye ku wa 13 Ukuboza 2024. Uyu muhango wabereye muri GS Shyorongi. Umuyobozi w'Akarere yashimiye ishuri Trust Mountain Academy ku butwari n'ubudatsimburwa ishuri rikomeje kugaragaza mu gihe gito rimaze rishinzwe.  Yasabye ibindi bigo kuryigiraho mu rwego rwo kuzamura ireme ry'uburezi mu karere ka Rulindo. Yakomeje agira ati ‘Tuzanezerwa cyane twumvise ko mu manota y’ikizamini cya Leta mu myaka itaha, umunyeshuri wa TMA ari mu icumi ba mbere (Top ten) ku rwego rw'igihugu. Mubiharanire kandi bizagerwaho, ahari ubushake byose birashoboka.'

 

Uyu munsi mukuru wabimburiwe n'umupira w'amaguru wahuje abarezi bo mu murenge wa Shyorongi ku kibuga cya APR FC, usozwa n'ubusane bw'abarezi bose barerera muri uyu murenge ndetse n'abashyitsi bari baje kwizihiza uyu munsi mukuru ngaruka mwaka w'umwarimu. Ku ruhande rwa Trust Mountain Academy, umwarimu IRAHOZA Sandrine wabaye umukozi w'indashyikirwa mu mwaka w'amashuri wa 2023-2024 yahawe igihembo cy'ishimwe.

MBANDIWIMFURA Alexandre

APPES Member